Duco(Gabay)

"Muciziga Mudiliga ahow Adaan Ku Magansadaaye
"Muciidow adaan ku tuugaa oon Ku Miciinsadaaye
"Majiidow ducada iga aqbal adaa, Mujiib naxariista ahe

"Soomaali ma jiro ruux saafiya oo, Maan fiyow-e
"Qabyaalad baa madax martayoo, Majnuun ka dhigtaye
"Mawlow Allahayow ka shaafi adaa Maalikoo casiis ahe

"Muxubiyo wanaag Macaaniyo kalgacal qaniya
"Mawlow boogooda isu mari adaa, Maalikoo naxariiste
"Mawlow walaalo ismaqla ka yeel adaa midayn karaye

"Midnimada soomaaliyeed Maalikow Muujiyoo quwee
"Midigtiyo bidixdaydu Maalikow Ma kala maarmaane
"Haday midi igoan tahay Ta kale col muquunin mayse
"Maandeeqiyo kaafiya wadankayga Maalikow midee

"Maan rag horaa loo yidhi waa Mudhucyo afkoode
"Ismaan dhaafkiyo muranka waa lagu Kala macjuufoobaaye
"Maqashad dhexdooda taala Eebow Xalkeeda muhiibse

"Masaakiinta macaluulshay maalikow Dhibta uga miciin
"Colaadiyo abaaraha malgeya Eebow meyey kaga maydh
"Munaafaqa diinta ku gabanaya iyo Maato laayaha
"Maalikow ka qabo mujrimkaa, Dhiiga ku mamay

"Kuwa Maala naaska ku naaxay ee, Ribada malabsanayaa
"Raga Macasha weynayee sixir bararka, Nagu maasheeyey
"Eebow naga qabo magaafyadaas, Mamayee soo malafsanaya

"Dadan madaxiyo mijo kala lahayn, Meel ma gaadhaane
"Duul hogaamiye mumina hor kacayn Milgo ma yeeshaane
"Maamul hanaqaada Eebow Mandaqada nooga dhali

"Masuulaan musuqmasuq aqoon, Muwaadin cadaaliya
"Mawlow madax nooga dhig Adaa og Midkuu yahaye.....

WT: Maanmaal Buureed Gurxan